عدم المحبة يؤدى أحيانا للانتحار

(قصة عن المحبة)

البنت اللي في الصور إسمها روزالي أفيلا Rosalie Avila، طفلة أمريكية عمرها 13 سنة، في نوفمبر اللي فات روزالي انتحرت. روزالي شنقت نفسها في غرفتها بسبب إن أصحابها في المدرسة كانوا دايما بيتريقوا على شكلها وبيقولوها إنها وحشة، وقبل الحادثة بأيام زمايلها في المدرسة عملوا فيديو ونشروه بيقارنوا فيه بين شكل البنت الحلوة والوحشة، واستخدموا صور روزالي كمثال للبنت القبيحة!
روزالي قبل ما تموت كتب لأمها الرسالة دي:
I love you, mom. I’m sorry you’re gonna find me like this. Please, don’t post any pictures of me at my funeral.“
بحبك يا ماما، أنا أسفة أنك هتشوفيني بالشكل دا، أرجوكي ما تنشريش أي صور ليا في جنازتي.”
عقوبة الأذي الجسدي معروفه، بس يا ترى إيه هي القوانين اللي بتحمي أولادنا من “الأذى النفسي” أو ما يعرف بظاهرة التنمر المدرسي (bullying) اللي بيروح ضحيته حوالي 20 ألف طالب سنويا حول العالم !؟ مافيش !!!
وعلشان مافيش أي عقوبة ضد الترهيب النفسي خليكم أنتم الـ “بودي جارد” لأولادكم وبناتكم، مش بمعنى إنكم تتخانقوا مع الناس علشان تحموهم، إنما تحموهم بإنكم تعلمهم يحبوا نفسهم.
علموا أولادكم يحبوا نفسهم زي ما هي بملامح وشهم، بطريقة كلامهم، بضحكتهم، بصوتهم، بشخصيتهم القوية، بإنطوائهم، بمشيتهم? بجريتهم، بإختيارتهم، بذوقهم في اللبس، بشعرهم،
علموهم إن أعز أصحابنا و أقرب الناس لينا هم اللي بيحبونا زي ما إحنا بطبيعتنا و تلقائيتنا، مش اللي احنا لازم نتغير علشان نرضيهم.
قلولهم إن مافيش حد في الدنيا هيبقى خايف عليهم أكتر من نفسهم. علموهم إنهم لو عايزين يتتغيروا فيتغيروا لنفسها، ولأن دي رغبتهم. علشان دي حياتهم مش حياه حد تاني. علموهم إن عمر ماحد هيشوفهم كاملين لو هم شايفين نفسهم ناقصين.
علموا أولادكم إن عمر ما حد هيحبهم لو هم ماحبوش نفسهم، وأول خطوة في إنهم يحبوا نفسهم هو بإنكم تبطلوا إنتقادكم الدائم ليهم ولحياتهم وتريقة على كل كبيرة وصغيرة وتقليل من أفكارهم وكلامهم وأفعالهم. إنكم تفكروهم بحبكم ليهم أحسن بكتير من انتقادكم الدائم بحجة الخوف عليهم.
احموا أولادكم وخليكم ضهرهم اللي بيتسندوا عليه، واصحابهم اللي بيشتكلهم، وأبوهم وأمهم اللي بيفتخروا بيهم مش بس لمجرد إنكم خلفتوهم! اتعبوا في تربيه أولادكم وما تكرروش أخطاء كتيره إتربينا عليها و نجيب جيل تاني شخصيته مليانه عقد وديفوهات.
املوا حياة أولادكم بالمدح والحب، وقربوا منهم واسمعوهم وسَمّعوهم الكلام اللي نفسهم يسمعوه منكم بدل ما يدوّروا على حد برة يسمعوه منه.
أرجوكم .. حبوا نفسكم، واتجوزوا ناس بتحب نفسها، وعلموا أولادكم وبناتكم يحبوا كل حاجه فيهم وفي غيرهم

شارك الفكرة مع خدام آخرين ✨

499

** لا توجد تعليقات على هذه الفكرة..