شاب أبطل السحر بدون قصد

(قصة عن الصلاة)

يحكي ابونا بيشوي الأنطوني
(وهو قديس معاصر وعايش وبيخدم في استراليا حاليا)
بيقول:
احنا بنغلب الشيطان بالمسيح يسوع
احنا القوه اللي معانا اكبر بكتير جدا من قوه الشياطين
مهما كان ضعفنا
الشياطين اضعف مننا
انا فاكر كويس جدا وانا كده في اولى ثانوي تانيه ثانوي حاجه كده
كان واحد صاحبي قال لي تعالى معايا عاوز اعمل عمل لحد يعني
فقلت له لا أنا ما أؤمنش بالكلام ده ومش عايز..
المهم قعد يتحايل عليا.. وتعالى وعشان خاطري وانت صديقي أوي مش هأتمن حد على السر ده غيرك..
رحت معاه من باب الفضول يعني
انا كان نفسي اتفرج اشوف ايه حكايه الاعمال دي وبيعملوا ايه بالظبط
وروحنا عند راجل ..
الراجل قعدنا.. وحطني انا في زاوية بعيد كدة
عشان انا مش اللي هدفع يعني
كنت قاعد في الكورنر
و الراجل ضلم نور الاوضه تماما وابتدى يقول كلام غريب انا مش فاهمه اصلا
فانا كنت صغير يعني، فقلت يا واد لا يكون في شوشو كده ولا شوشو كده
طب ايه!! صلي شويه في قلبك يعني ابانا الذي ولا فلنشكر ولا ارحمني
فقعدت اصلي في سرى واقول كده..
الراجل اللي هو بيعمل الاعمال فجأه راح دايس على زرار منور النور كله
وقال لي: ولا.. انت مسيحي؟
- قلت له اه.
- بتقول حاجه في سرك؟
- قلت قلت له اه طبعا بقول حاجه في سري.. انا مش عارف انت بتعمل ايه اصلا
- قال لي: اخرج برة..
ف صاحبي قال له : ده صاحبي ده انا اللي جايبه
قال له اه بس مش هينفع اعمل لك حاجه وهو قاعد لازم يطلع بره.
+ وانا عيل لا فاهم انا بعمل ايه ولا بسوي ايه ولا كنت فاهم اصلا ايه الموضوع
لكن قوه المسيح اللي معانا اقوى بكتير جدا من اي شياطين واي اعمال
استخدموا قوة المسيح الجبارة دي ضد الشيطان لما ييجي يحاربكم..

موضوعات مرتبطة بالفكرة :
#الحروب الروحية

شارك الفكرة مع خدام آخرين ✨

482

** لا توجد تعليقات على هذه الفكرة..