إضافة للمفضلة

استخدام الفكرة

إبلاغ عن مخالفة

ماركو برسوم
2025-07-07

هل ربنا يسوع كان بروتستانتي ولا ارثوذكسي ولا كاثوليكي؟ نشأة الطوائف

(درس عن الطوائف)

Share >

هل ربنا يسوع كان بروتستانتي ولا ارثوذكسي ولا كاثوليكي؟
+ المسيح له المجد على أيامه، وما بعد ايامه بكتير
ما كانش في حاجه اسمها بروتستانتي ولا ارثوذكسي
+ كان في حاجه اسمها تلاميذ ..
حتى مش مسيحيين، ما كانوش اسمهم مسيحيين
فأول حاجه كان اللي يؤمن بالمسيح يسموه تلميذ..
فلما المسيح اختار 12 راجل وال 12 راجل دول ب سميناهم 12 تلميذ
مش 12 مسيحي
12 تلميذ وقعدنا فتره على كده كل اللي يؤمن بالمسيح نسميه تلميذ
فالمؤمنين بالمسيح يسموهم تلاميذ
+ وبعد شويه المسيح لما جه يصعد للسماء، جمع التلاميذ كلهم والرسل وقال لهم:
اذهبوا وتلمذوا جميع الأمم..
+ كلمه تلمذوا يعني ايه يعني خلوهم تلاميذ علموهم وعمدوهم باسم الاب والابن والروح القدس
علموهم ان يحفظوا جميع ما اوصيتكم به وها انا معكم كل الايام والى انقضاء الدهر

+ ومن ساعتها التلاميذ والرسل انتشروا في المسكونة كلها
في كل العالم راحوا يبشروا بالمسيح
وكل اللي يؤمن بالمسيح نسميه تلميذ..
+ لحد لما جه معلمنا بولس وبرنابا كانوا قاعدين
مره في انطاكية وعلموا ناس كتير وكتير قوي من الناس امنت بالمسيح
وبدأوا يقولوا على اللي يآمن: انهم اسمهم "مسيحيين"
ودي اول مره يتقال كلمة مسيحي على اللي يؤمن بالمسيح
ودي جت في سفر اعمال الرسل 11
فحدث انهما اجتمعا في الكنيسة (بولس وبرنابا)
سنه كامله وعلما جمعا غفيرا
ودعي التلاميذ مسيحيين في انطاكية اولا
اول مره يتقال كلمه مسيحي على اللي بيامن بالمسيح

+ يبقى كان العالم كله ، اللي يؤمن بالمسيح اسمه مسيحي
لا بروتستانتي بقى ولا كاتوليك ، مافيش الكلام ده
هاول ما المسيح سلم كنيسته للرسل، سلم كنيسه واحده..
كنيسه واحده بس وكل اللي يامن في كل الدنيا ..
الهنود والروم وأوروبا وامريكا واسيا وافريقيا والعرب..
كله اسمه مسيحي بس

+ لكن الشيطان مش هيسكت
الشيطان عايز يقسم الكنيسه
فحصلت ثلاث اربع مشاكل كبار
تعالوا نشوف تاريخهم


التهود :
ايه اول مشكلة كبيره حصلت دي حصلت أيام الرسل نفسهم
أيام ما كان الرسل موجودين
اسمها مشكله التهود، دي سنه حوالي 50 او 51 ميلاديه
كان لسه الرسل كلهم موجودين
ايه مشكله التهود دي؟
لما كان الرسل بشروا للناس كانت الناس نوعين:
في ناس يهود اللي هم كان عندهم الديانه اليهوديه موسى والشريعه والتوراه والاسفار
وفي ناس وثنيين،
وكتير كان يؤمن بالمسيح، وكلهم بقوا مسيحيين.
بس فيه مسيحي اصله يهودي وفي مسيحي اصله وثني
فالمسيحيون اللي اصلهم يهودي كانوا يقولوا للتانيين اللى من أصل وثني:
انتوا ايمانكم غلط..
يقولوا ليه؟ ما احنا اتعمدنا زينا زيكم!!
يقول: لا ! انتم امانكم مش صح لازم
الاول علشان تبقى مسيحي لازم تبقى يهودي الاول
وتآمن بموسى الأول، وتقرا الاسفار الأول.. وتختتن الأول..
** انتم عارفين طبعا الختان ايام اليهودية، كان شيء ضروري جدا ان الشخص اليهودي يختتن
فكانوا المسيحيين من اصل يهودي يقولوا للتانيين لازم تختتن الاول
فالمسيحي اللي من اصل وثني راحوا للرسل: الحقونا !!!
دول بيقولوا لنا كذا...
هو احنا صحيح لازم نختتن؟؟؟
فحصلت مشاكل كده.. اه وللا لأ؟ .. اه وللا لأ؟
فحصل ايه بقى ساعتها؟
حصل ان الرسل جمعوا بعضهم وعملوا مجمع
وده اول مجمع تشوفه الكنيسة
يعني ايه مجمع؟
مجمع يعني اجتماع نناقش فيه المشكله
فأول مجمع ده حصل في اورشليم
والمجمع ده تقروا عنه في سفر اعمال الرسل 15
اصحاح 15
يقول ان اجتمعوا الرسل والمشايخ وبدأوا يحكوا..
بولس يقول، بطرس يقول، برنابا يقول..
وفي الاخر ، كان رئيس المجمع القديس يعقوب ..
طلع بقرار المجمع انه مش لازم نختن الناس الوثنيين اللي هتآمن..
مش لازم يختتنوا ، نبعت لهم بس نقول لهم:
امتنعوا عن الزنا وعن المخنوق وعن الدم وعن الاعمال الوحشه اللي كنتم تعملوها
ويتعمدوا ويبقوا مسيحيين وخلاص والمشكلة اتحلت على كده
ونشكر الله
نشكر الله ظلت الكنيسة وحده واحده لحد الوقت ده مسيحيين
ادي اول مشكله وخلصت


+ أريوس ومجمع نيقية
بعد يجي 300 سنه حصلت مشكله تاني كبيره
الشيطان عايز يقسم الكنيسة
جه واحد اسمه اريوس
وده كان راجل قسيس من ليبيا حدود مصر
وطلع شكك في لاهوت المسيح
وقال المسيح مش اله كامل قوي
ليه يا عم؟؟
قال: ما هو نفسه قال ابي اعظم مني!!!
فكده المسيح اقل من الاب في اللاهوت
اقل من الاب في الجوهر
يا عم اريوس مش كلام اللي انت بتقوله ده !!
طب ما هو نفسه قال انا والاب واحد
ومن راني فقد راى الاب
وفي حاجات كتير تثبت ان المسيح هو الله
قال لا!! المسيح اقل من الاب

كان البابا السكندري (البابا اللي في اسكندرية) المسؤول عنه ساعتها كان اسمه البابا الكسندروس
ده البابا رقم 19 ، عمل مجمع صغير كده في مصر وحرم القسيس ده وقال اريوس مش تبعنا
احنا نحرم اريوس ، وفعلا حرم اريوس
بس مشكله اريوس انتشرت في العالم كله
وهو ماسكتش وبدا ينشر تعليمه في الدنيا كلها
وصلت تعليمه الى كل أوروبا
والامبراطور الأوروبي امبراطور روما كان مسيحي في الوقت ده
فقال يا جماعه ايه اللي انا سامعه ده
فيه مشكله هو صحيح المسيح اقل من الاب ولا هو والاب واحد ولا ايه الحكايه بالظبط؟؟
فقال اعمل مجمع
يعني ايه مجمع ؟؟
يعني اجتماع قاعد فيه الكهنة والاساقفة يحلوا المشكلة
فاتعمل مجمع، بس هنا بقى مجمع اسمه مجمع "مسكوني"
يعني ايه مجمع مسكوني؟
يعني يحضروا اسقفه من كل المسكونة من كل العالم
وده اول مجمع مسكوني يحصل
المجمع المسكوني الاول كان في مدينة نيقية (في تركيا)
سنه 325
والمجمع ده حضره 318 اسقف
وحضروا شماس من مصر مع البابا بتاع مصر
اسمه البابا الكسندروس ، وهو البابا رقم 19
كان معاه شماس اسمه اثناسيوس
في المجمع ده اثناسيوس هو اللي كل شويه يرفع ايده ويقف يرد على اريوس
كل شويه يرفع ايده ويرد على اريوس
فأثناسيوس الشماس ده هو كان بطل المجمع
المهم ناقشوا اريوس وحرموا اريوس
وفند التعليم بتاعه وهم قاعدين
قالوا لا استنوا بقى طب ما احنا قبل ما نمشي نحط قانون عن المسيح
وماحدش يحيد عنه بقى
وده يتنشر في كل الكنائس كلها
وفعلا عملوا قانون اسمه قانون الايمان النيقاوي (نسبة إلى مجمع نيقية)
اللي هو اوله بالحقيقه نؤمن باله واحد الله الاب.....
لحد كلمة نعم نؤمن بالروح القدس...
تلاحظوا ان قانون الايمان اللي اتحط في مجمع نيقية ده كله بيتكلم عن المسيح له المجد ولاهوته
ان هو جه وتجسد وتأنس وصلب عنا وقام..
لحد كلمة: نعم نؤمن بالروح القدس..

طب ما كملوش ليه ؟؟
لان ما كانش حد بيتكلم عن الروح القدس..
هي المشكله كلها كانت في اريوس وانكاره للاهوت المسيح
ونشكر الله المشكلة اتحلت على كده ..
هل الكنيسة اتقسمت؟؟ لا
نشكر الله ان الكنيسه لم تنقسم بعد المشكله الاولى
يعني ايه لم تنقسم يعني كل الاساقفه اللي حاضرين 318 اسقف
كلهم زي بعض، كلهم مسيحيين،
ما فيش واحد فيهم كبير وواحد فيهم صغير
كانوا بيجيبوا رئيس المجمع (اللي هو اكبرهم سنا)
بس وخلاص على كده.. وكلهم مسيحيين..
وخلصت المشكله الاولى وما حصلش للكنيسه انقسام

يبقى المشكله الاولى كانت مشكلة التهود،
والمشكله الثانيه كانت مشكلة اريوس بتاع مجمع نيقية


+ مجمع القسطنطينية :
نيجي المشكله الثالثه بعد حوالي 60 سنه وبالظبط سنه 381
جه واحد اسمه مقدونيوس
مقدونيوس ده بنسميه عدو الروح القدس
مقدونيوس ده قال الله اقنومين بس
اب وابن
طب والروح القدس يا عم
قاللك لا الروح القدس ده مش اقنوم مش اله يعني !!
ليه يا عم ؟
قاللك ده مجرد طاقه كده ، طاقه بس ، حاجه كده .. طاقه
مش اله يعني ..
فالكنيسه قالت لا الكلام ده مش مظبوط
طب نحل الموضوع ده ازاي ؟؟
نعمل مجمع واتعمل مجمع مسكوني
اسمه المجمع المسكوني الثاني
اللي هو مجمع القسطنطينيه
وده حضره 150 اسقف من كل المسكونه
والبطرك السكندري بتاعنا كان اسمه البابا تيموثاوس
هنا بقى قعدوا عشان يحلوا مشكله ايه ؟
هل الروح القدس ربنا ولا مش ربنا ؟؟
قعدوا يتناقشوا وحرموا مقدونيوس
وكملوا قانون الايمان الاولاني اللى كان وقف لحد نعم نؤمن بالروح القدس
راحوا مكملين بقى الرب المحيي المنبثق من الاب ....
ونشكر الله الكنيسه لم تنقسم..
احنا كده كنيسه وحده واحده لحد سنه كام؟
سنة 381
والكنيسه ما اتقسمتش
مع ان حصلت ثلاث مشاكل كبار
مشكله التهود
ومشكله اريوس
ومشكله مقدونيوس



+ نسطور ومجمع افسس
بعد المجمع ده بحوالي 50 سنه كمان كده
وصلنا لسنه 431 جت المشكله الرابعه
واحد اسمه نسطور
نسطور ده كان بطرك
نسطور ده عدو أم النور
عدو ام النور
قال : ان المسيح ده هو شويه يبقى انسان وشويه يبقى اله!
يعني ايه يا عم ؟
قاللك يعني هو شويه بيبقى انسان : لما بياكل وبيشرب وبينام ، ده كده بيبقى انسان وما بيبقاش اله.
وبعدين يتحول لاله تاني لما بيقوم من الموت وبيمشي ع البحر
فهو شويه اله وشويه انسان
لا احنا ما بنؤمنش بكده !
احنا بنؤمن ان هو اله متجسد
اله متجسد
لاهوته لم يفارق ناسوته لحظه واحده ولا طرفه عين
وعشان كده قال لنا ما تقولوش عن العدرا ام الله !!
امال نسميها ايه يا عم ؟
قال لك نسميها أم يسوع
ليه؟
لان هو شويه انسان وشويه اله !!
فلما كان العذرا بتولد ، كان ايه ؟
كان انسان !!
فالعذر ولدت يسوع الانسان اللي بعد شويه ممكن يبقى اله !!
ايه هو الهرر اللي انت بتقوله؟؟
لا .. العذرا ده الملاك جال لها وقال لها المولود منك يدعى ابن الله
ولما راحت لأليصابات قالت لها من اين لي هذا ان تاتي ام ربي الي
فالمسيح من اول ما كان في بطن العذرا هو انسان وإله
اله متجسد ..
مقدونيوس مارضيش بكده ..
واتعمل له مجمع..
المجمع المسكوني الثالت اللي هو مجمع افسس
وده حضره 200 اسقف والبابا السكندري بتاعنا اسمه البابا كيرلس عمود الدين
البطرك 24 عمود الدين
واللي هو قال مقدمة قانون الايمان
اللي هو نعظمك يا ام النور الحقيقي ....
ونشكر الله ، الكنيسه لم تنقسم ، كده وصلنا 430 سنه
من اول ما المسيح صعد لحد سنه 430
وكل اللي في الدنيا كلها اللي بيؤمنوا بالمسيح اسمهم مسيحيين
ما فيش ولا بروتستانتي ولا كاثوليكي ولا ارثوذكسي ولا حاجه
وكل لما تحصل مشكله يتجمعوا كلهم يناقشوها يحلوها
تحصل مشكله يتجمعوا يناقشوها يحلوها


+ الإنقسام الأول
الشيطان عايز يقسم الكنيسه
والشيطان عمل كذا بدعه والكنيسه ما تقسمتش
فالشيطان شاطر ..
قاللك بس .. انا مش هعمل بدع تاني
انا هدخل في دماغهم مين اعظم من مين!!!!
ودي الفكره اللي المسيح قال لهم إوعوا من دي !!
فاكرين لما التلاميذ كانوا بيسألوا : مين فينا الاعظم؟
راح المسيح جمعهم قال لهم إوعوا من دي !!
دي لأ ، بلاش الموضوع ده

ايام بقى البابا اللي بعد البابا كيرلس عمود الدين
اللي هو البابا ديسقورس
ده بنسميه بطل الارثوذكسيه
البطل رقم 25
جت بقى فكره هو مين اعظم في البطاركة؟!!
بطرك روما ولا بطرك القسطنطينيه ولا بطرك اسكندريه
مين اعظم في البطاركه
طب ليه السؤال ده ؟
ما احنا كلنا حلوين ما احنا كلنا اخوات
والمسيح قال لنا بلاش الحته دي !!
قال لك لا!
مين اعظم بقى ؟!
طبعا بتوع روما قالوا بطرك روما هو الاعظم
ليه ؟
اقول لك ليه !!
لان طبعا هي الامبراطوريه
في الوقت ده كان كلها امبراطوريه رومانيه
وامبراطور روما اللي هو كان محتل العالم
اللي هم اساسا قعدوا يقتلوا في المسيحيين كتير
وبعد شويه جه قسطنطين اللي سمح للمسيحيه انها تنتشر
واللي بن كنيسه القيامه واللي بنى كنايس كتير
واللي فتح الكنايس وطلع المساجين من السجون
ده بطرك مين؟ بطرك روما
هو اللي نشر المسيحيه بعد كده
واللي فتح الكنايس كلها
فبما معناه ان الامبراطور بتاعنا هو اللي فتح لكم كل الدنيا
فعشان كده بطرك روما هو اللي اعظم
يا عم بلاش الحته دي !!
وقالوا وكانوا متغظين شويه من البابا ديسقورس كان عظيم جدا
فأخذوه وسجنوه وضربوه ونفوه الى جزيره اسمها جزيره غاغرا
وبعد كده اتعمل مجمع اسمه مجمع خلقدونيا سنة 451
وما حضروش البابا بتاعنا لانه كان منفي
وفي المجمع ده نقشه طبيعه المسيح
المسيح طبيعة واحده ولا طبيعتين ؟؟
وطلعوا ان المسيح طبيعتين مش طبيعه واحده
احنا نؤمن في الشرق هنا ان المسيح له طبيعه واحده من طبيعتين
بس اسمها طبيعه الله الكلمة المتجسد
هناك قالوا لا !!
ده هو طبيعتين ساعات يبقى انسان وساعات يبقى اله
المجمع ده ما حضروش بابا الاسكندريه
والمجمع ده بترفضه كنيسة اسكندرية كلها
وبنرفض النتائج بتاعته وبنرفض تعليمه
والمجمع ده هو اللي شق الكنيسه
اول شق في الكنيسه اول انقسام
يبقى اول انقسام حصل سنه كام
سنة 451
خلي بالك بقى يبقى من اول المسيح، المسيح سلم كنيسة واحده
نزلت كنيسه واحده ايام الرسل ..
حصل ثلاث مجامع نيقية والقسطنطينيه وافسس
وكنيسه واحده
لحد لما جه مجمع مين خلقيدونيا
شق الكنيسه نصين الى كنيسه شرقيه وكنيسه غربيه



ألخص لك الموضوع اللي انا قلته ده :
قلنا رقم واحد انتشار المسيحيه في العالم كله
المسيح قال للرسل إكرزوا في العالم كله ،
راح التلاميذ راحوا في كل الدنيا ونشروا المسيحيه في العالم كله
وكان في اربع كراسي كبار اربع بطاركه كبار
كرسي اسكندريه كرسي انطاكية كرسي القسطنطينيه وكرسي روما
دول كانوا اربع كراسي كبار في المسكونه كلها
بس مين احسن من مين ماحدش احسن من حد !!
كلهم بطاركه وكلهم اخوات
ولذلك على فكره ساعات تقروا في السنكسار
يقوللك النهارده في السنكسار بتاعنا القبطي
نياحه القديس فلان بطرك روما
نعم ؟؟ واحنا مالنا ومال بطرك روما
اصل في الفتره دي اللي هي قبل 451
الفتره دي كان كلهم اخوات
وكنا ممكن نعيد مع بعض ونصلي مع بعض
وكل حاجه الاربع كراسي الكبار اسكندريه وانطاكية والقسطنطينيه وروما
وحصلت مشاكل ، والمشاكل اتحلت
واتعمل مجمع نيقية والقسطنطينيه وافسس
وفضلت الكنيسه واحده..
وكان اول انشقاق كبير بسبب مجمع خلقيدونيا المشئوم سنه 451
وانشق العالم المسيحي الى كنائس شرقيه وكنائس غربيه
الكنائس الشرقيه تتزعمها كنيسه اسكندريه، ودول بنسميهم ارثوذكس
والكنائس الغربيه تتزعمها كنيسه روما .. ودول بنسميهم كاثوليك

+ ارثوذكس معناها ايه مستقيم
+ ودول بنقول عليهم كاتوليك والكاثوليك معناها كنيسة جامعة
عشان مجمعه أغلب مسيحيين العالم
وكده اتشقت الكنيسه إلى ارثوذوكس وكاثوليك!

طب فين البروتستانت ؟؟
مافيش البروتستانت
احنا كده سنه كام في التاريخ يا جماعه؟ 451
كمل معايا بقى .. وفي شويه تفاصيل بعد كده بس مش تتطرق ليها

لكن ممكن نقول ان في القرن الحادي عشر
انفصلت كنائس القسطنطينية واليونانية وشقيقاتها
عن الكنيسة اللاتينية وأصبحت هي الأخرى تعرف بالكنيسة الأرثوذكسية.


ندخل على القرن ال 16
احنا في القرن ال 16 دلوقتي
انتوا عارفين يعني ايه من اول ما المسيح جه لحد قرن 16 ؟؟
ده لسه من 500 سنه

كانت الكنيسه الغربيه اللي هي الكاثوليكيه بدأت تفسد
وبدا البطاركه يبقوا فاسدين والكهنه يبقوا فاسدين
رجال الدين فعلا كانوا فاسدين
فعلا كانوا مش حلوين
فاكرين الكهنه ايام المسيح له المجد؟
الكتبة والفريسيين والكهنه كانوا مش حلوين
وصلت بالكنيسه الكاثوليكيه ان الكهنه والرهبان والبطرك يبقوا وحشين جدا في اخلاقهم
بينما كانت الكنيسه الاسكندرية بتطلع قديسين
كانت الكنيسه الغربيه بدات تفسد
وكانت يقول لك علشان اعترف اديك فلوس
وبداوا يوزعوا حاجه اسمها صكوك الغفران
صكوك الغفران اللي هو سر الاعتراف انت عايز تخش السما انا ممكن اديك الحل
بس اديني فلوس هات 200 جنيه مثلا و هات 500 جنيه واديك الحل
طبعا انت لو لقيت كاهن بيقوللك هات فلوس واديك الحل تقول له ايه ؟؟
هات فلوس عمدك !!
فبدا الشعب ينقلب على الكهنه
مش عاجبه الحال ايه ده الكنيسه بقت وحشه
و هي فعلا بقت وحشه والكهنه فعلا بالحقيقه بقى وحشين
فطلع واحد اسمه مارتن لوثر سنه 1529
مارتن لوثر ده قال الوضع ده مش هينفع
احنا لازم نحتج على الموضوع ده
وفعلا عمل ثوره اسمها ثوره الاصلاح
فقام مع مجموعه مارتن لوثر مجموعه سموا نفسهم المحتجين
اللي هم البروتستانت
على فكره كلمه بروتستانت معناها محتج مش معناها انجيلي
كلمه البروتستانت معناها ايه المحتج او المعارض
قاموا على الكنيسه الكاثوليكيه الغربيه
وانشقوا عليها وقالوا احنا مش تبعكم خلاص
احنا نعمل كنيسه لوحدنا
طب يا عم مارتن لوثر كتر خيرك
انت بصراحه عندك حق انك انت تنقلب على الكهنه، اوكي
بس اللي ينقلب على الكهنه يحاول يصلح الموضوع
يقول لك لا ، احنا مش عايزين كهنه خالص
وعمل كنيسه لوحده كده
طب نتناول ازاي ؟؟ قاللك مافيش تناول
طب نتعمد ازاي ؟؟ مافيش معموديه
طب نعترف ازاي ؟؟ مافيش اعتراف
ليه يا عم ؟
قاللك ما اصل اللي هيقوم بالحاجات دي كلها مين ؟؟ الكاهن
واحنا مش عايزين كهنه.. لان الكهنوت بقى فاسد
اذا ، هو عنده حق في حته وماعندوش حق في حته
هو عنده حق ان الكهنوت بقى فاسد
بس الحل ايه ؟؟ ان احنا نصلحه !!
لكن تلغيه خالص .. لا
زي مثلا لما تكون انت روح لدكتور والدكتور يطلع مش شاطر
تعمل ايه ؟؟ تغير الدكتور
لكن يقول لك لا مافيش دكاترة . هنلغي كليه الطب
لا هو غلط في الحته دي فلغى الكهنوت
فطلع بعد كده البروتستانتيه ولغى كل الكهنوت
وكل الاسرار
وعمل كنيسه لوحده
الكنيسه دي مالهاش اساس
كده الكنيسه بقت كم كنيسه ؟؟
ثلاثه ارثوذكسيه الشرقيه
وبعدين الغربيه الكاثوليكيه
ودي طلع منها البروتستانت
عشان البروتستانت مالهمش مركز مالهمش قائد مالهمش بابا
فبدا كل شويه ناس تحتج على ناس منهم فيهم
فيطلع بطايفه كمان
يطلع في طايفه كمان
يطلع بقا طايفه كمان ..الخ
لحد دلوقتي وصل الطوايف البروتستانتيه في العالم لحد دلوقتي
حوالي 26000 طايفه كل واحد بمزاجه
كل واحد بعقيدة
كل واحد بكنيسه
الادفنتست والسبتيين وشهود يهو و كل مجموعه لوحدها
لان مالهمش مرجعيه يعني ..
طب والشرق ؟ الاسكندريه ؟
ارثوذكس.. من اول المسيح لحد دلوقتي ..



طب الطوايف دي دخلت مصر ازاى؟
مش مصر المفروض كلها ارثوذكس؟
جاءت مع الحملات
فالكاثوليكية بدأت تدخل مصر مع الحملة الصليبية
بقيادة لويس التاسع سنة 1219 م.
وتأسست بشكل رسمي مع الحملة الفرنسية على مصر
حوالى سنة 1800

أما البروتستانتية فقد عرفت طريقها إلى مصر
وتأسست بشكل رسمي في أبريل 1860 م
في شارع درب الجنينية بالموسكي
ثم نقلت إلى حي الأزبكية
يعنى البروتستانتية دخلت منذ اقل من 200 سنة فقط

أما عن السبتيين فقد بدأ ظهورهم في مصر عام 1932،
وبدأوا يشترون العقارات لتأسيسها كمزرعة ومدرسة وملجأ للأيتام ومدرسة للدراسة بالمراسلة،
ثم غادر الأجانب البلاد تاركين الجماعة لمن استطاعوا استمالتهم..

وأخيرًا، شهود يهوه، فقد أسسها في مصر عامل ملهى يوناني
اسمه بنايوتي أسبيرولو ، تعاون معه آخرون
وافتتحوا مركزهم الرئيسي في العقار رقم 153 بشارع رمسيس - القاهرة، وغيره..
ثم صدر قرار من وزير الشئون الاجتماعية التنفيذي بحَل جمعيتهم وتحريم نشاطهم
لما وضح لمناهضتهم لتعاليم الأديان ونظام الدولة.



تلخيص التلخيص:

يبقى من الاول خالص

+ من المسيح لحد سنه 451 كان الكل مسيحيين
+ بدا الانقسام إلى أرثوذكس وكاثوليك سنة 451 بعد مجمع خلقيدونية المشئوم
+ في القرن ال 11 انفصلت كنائس القسطنطينية واليونانية وشقيقاتها عن الكنيسة اللاتينية (كنيسة روما) وأصبحت تعرف بالكنيسة الأرثوذكسية.
+ في القرن ال16 سنة 1529 الكاتوليك حصل فيهم انشقاق الى كاثوليك وبروتستانت
+ والبروتستانت انقسم مع نفسه الى الاف الطوائف لأن مالهمش مرجعية

دي فكره عامه عن نشأة الطوائف
ربنا يديكم نعمه وبركه