خانة اليك!

(تأمل عن محبة الله لنا)

خانة اليّك .. د.مجدي إسحق

تعبير عارفه لعيب الطاولة ، لما القشاط يتحبس في الخانة الاخيرة ، ساعتها الهزيمة بتبقي اكيدة، و الخسارة محتومة، و مستحيل الدور يكمل.. يبقي ننهي الدور لأنه مفيش امل..

لكن عند ربنا مفيش امل مقطوع ، و لا هزيمة محتومة و لا موت اكيد ..

خانة اليك عند موسي كان البحر ، عند دانيال كانت الأسود الجائعة في الجب، عند الثلاثة فتية اتون النار ، عند التلاميذ العاصفة العاتية في البحر، عند اليشع الجيوش العاتية المحيطة بالجبل، عند يوسف كان السجن ظلما ، عند الابن الضال كانت كورة الخنازير ، عند بطرس كان السجن منتظرا الإعدام..

و اله الكون حل كل ده : عند الرب السيد للموت مخارج. (مزمور 68 : 12) ..

لو الامل عندك مات و كل الابواب اتقفلت و لقيت نفسك علي آخر نفس ، افتكر ان السما ما بتعترفش بالمستحيل ، و عندها حل للي مالهوش حل ..

ما تخافش من خانة اليّك ، محلولة و مقضية و متسهلة بنعمة الله ..