يارب حنن قلوب عبيدك

(قصة عن العطاء)

لقيت ست قاعدة ع الأرض ...حاطه قدامها قفص و عليه فرختين ...أيوة فرختين 2 بالعدد و كانوا كبار شويه

انا مش بحب الفراخ الكبيرة فقولت لها عاوز فراخ أصغر شوية من فضلك .... قالتلي مفيش غير دول قولت لها خسارة يمكن لو كنت جيت بدري شويه كنت لقيت حاجة تاني ... راحت مدارية وشها و معيطة .... ليه بتعيطي و الله ما أقصد حاجة وحشة .... قالت اصل لو كنت جيت الصبح بدري كنت برضه هتلاقي الفرختين دول هما هما

أنا قاعدة كده من بعد الفجر و انا مش بياعة فراخ ....دول فرختين مربياهم بقالي 5 شهور علشان اوكلهم للعيال و لما راحوا المدرسة بهدومهم و شنطهم القديمة قالوا لهم في المدرسة إنكم مش هتستلموا الكتب الا لما تدفعوا المصاريف

فصحيتهم الفجر و سألتهم :

تستلموا الكتب و لا تاكلوا فراخ؟

قالولي الكتب

فطلعت ع السطح جبت الفرختين و استأذنت صاحب المحل ده اقعد قدامه ابيع الفرختين و اروح

و كل اللي يعدي يخسف بيهم الأرض و خايفة يموتوا من الحر .... و لا العيال تأكل و لا تتعلم. ... قولت لها عاوزه فيهم كام؟

قالتلي الواحدة ب 70 و الله دول تربية بيتي و بلدي و الواحدة ترمي يجي 2 كيلو لحم. .... بس بالله عليك ما تفاصل فيهم

قولت لها طيب انا مش بعرف ادبح ممكن تدبحيهم و تنضفيهم و اديتها 200ج و هجيلك بعد شوية بس هجيب حاجة و اجيلك .... فرحت جدا و قالتلي حاضر هدبحهم عند الفرارجي اللي ع الناصية و استناك بس متتأخرش عليا

طلعت جري ع التوحيد والنور

اخدتلها شنطتين و شوية أدوات دراسية و اخدت فلوس زيادة و نزلت جري برضو

اشتريت شوية خضار و سمنة و زيت و رز و رجعت لها لقيتها ماسكه كيس فيه الفراخ و فرحانه قوي اديتها الحاجة و قولتلها روحي اطبخي الفرختين للعيال قالت دول بتوعك قولتلها ما انا قولتلك من الأول مش بحب الفراخ الكبيرة

عيطت و ....

بعدها خرج صاحب المحل اللي مراقب الموقف كله من أوله. .... قالها مش قولتلك ربك كريم

مشيت و هي في منتهي السعادة بعد لما اديتها رقمي

وقفت شويه ابصلها و هي بتبعد ....

صاحب المحل بصلي وقالي عرضت عليها الصبح فلوس .... بس هي رفضت .. سيبتها تقعد و كل شوية أطل عليها و الله كان في نيتي اديها تمنهم بس عفتها منعتني و لما شوفتك طولت معاها. ..دخلت صليت و دعيت ان ربنا يرقق قلبك عليها

و الحمد لله ..... استجاب

مجاناً أخذتم مجاناً إعطوا (متى 10: 8)

شارك الفكرة مع خدام آخرين ✨

507

** لا توجد تعليقات على هذه الفكرة..