البوربوينت
الفيديو
الفقرات الكتابية
أقوال الآباء
الاسكتشات
وسائل الإيضاح
الدروس
ماركو برسوم
2021-07-14
قبول عيوب النفس وعيوب الآخرين
(قصة عن المحبة)
بنت صغيره كانت قاعده بترسم في ورقه، رسمت شجره و بحر حلويين قوي بس لما جت ترسم المركب باظت منها شويه ، بس مش ديه المشكلة ، المشكلة انها لما لقيت المركب باظت شويه قعدت تعيط و راحت مشغبطه علي الورقة كلها و بوظت البحر و الشجره اللي كانوا حلويين. و بعد شويه قطعت الورقة و مردتش ترسم تاني...
ساعات كتير احنا بنعمل كده في حياتنا، بتكون في علاقه حلوه فرحانين بيها زي الشجره و البحر و بعد شويه العلاقه ديه بيحصل فيها موقف مش كويس المركب اللي باظت فنركز قوي علي الجزء الوحش اللي في اللي قدامنا و نبدأ نشغبط علي كل الحاجات الحلوه اللي فيه و نقلل من جمال الحاجات اللي كنا بنحبها فيه. و ممكن كمان نقطع الورقة.
اللي بنعمله ده نتيجه عيوب في طرق تفكيرنا، واحده من العيوب ديه اسمه التفكير القطبي، اللي هو الأبيض و الأسود .. يعني يا بنشوف الصوره حلوه يا بنشفها وحشه.
و طبعا مفيش حد وحش و مفيش حد حلو،
كلنا صورتنا فيها الأبيض و الأسود الوحش و الحلو .. محدش كامل و متتوقعش ان صورتك او صوره اللي قدامك كلها بحر و شجر بس، لأه انت عندك عيوب المركب اللي باظت و كل حد صورته فيها لخبطه و ضعف.
متعملش علامه علي اللي قدامك و تشطب عليه..
ركز علي الحلو اللي فيه و لما عينك تفتح علي الوحش اللي فيه افتكر ان انت كمان فيك.
و نفسي كلنا نتعلم نرحم بعض و نرحم نفسنا .
** لا توجد تعليقات على هذه الفكرة..
