البوربوينت
الفيديو
القصص
الفقرات الكتابية
أقوال الآباء
الاسكتشات
وسائل الإيضاح
الدروس
ماركو برسوم
2021-07-20
مش هاجى الكنيسة تانى
(مقال عن الحروب الروحية)
قالك أنا مُعثر و مش هاجى الكنيسة تانى!
- ليه خير؟
- ياعم أنت مش شايف الناس عاملة إزاى؟ الناس وحشة و بتتكلم على بعض,المحبة راحت, بص الخدام, بص الشمامسة بيعملوا أيه! ده حتى أبونا! مبقاش فيه كهنوت زى زمان!
- كل الناس يعنى؟ مش نسبة منهم؟
- كل الناس أه , انا مش هاجى الكنيسة تانى.
- وهتروح فين إنشاء الله؟
- هروح كنيسة تانية! أو مش هروح خالص, هكون أحسن , مادام أنا بروح الكنيسة أتعثر أروح ليه!
ناس فاكره إن الكلام ده بيتسمع فى كنيستها بس, لكن الحقيقة هو جوه كل كنيسة !
موضوع إن واحد يُعثر مش مقبول بالنسبالى الحقيقة !
أنا موضوعى مش مع اللى عَثَرُه, ده موضوعه محسوم,
أنما انا موضوعى معاه هو,
انت فرفور ليه كده ياعم! يعنى أيه تُعثر يعنى! هتقولى الكتاب قال من اعثر احد هؤلاء الصغار....
و انا هقولك هو انت ليه لسه من الصغار ؟! ( أقرا متى 18)
تلات نقط قالهم واحد حبيبى لما كنت انا برضو مُعثر :)
من فضلك جاوب على الاسئلة اللى جاية فى سِرَك.
1- أنت عمرك روحت مستشفى؟
ولقيت فيها عيانين؟
إزاى المستشفى بتخفف الناس و فيها دكاترة و علاج و تلاقى فيها عيانين؟
طب ممكن تروح تلاقى الدكتور عيان؟
دكتور ويعيا ؟ ده هو اللى بيعالج الناس!
الحقيقة إن الكنيسة هى المستشفى بتاعتنا, هى المكان اللى بيعالج حياتنا الروحية, ليه مستغرب إنك تلاقى فيها خطاه؟ هما لو كانوا مش بشر يبقى أكيد ملايكة مش هايجوا الكنيسة ساعتها وهيكون مكانهم فى السما ?
لكن الطبيعى بتاع الكنيسة أنك تلاقى فيها خطاه و بيتعالجوا لسه ,
طب هيخفوا إمتى؟ ده شغل ربنا مش شغلك! المهم أنا وأنت هنخف إمتى!
ده السؤال اللى يتسأل.
- طب الكنيسة و فيها خطاه لكن الخدام و الشمامسة و ابونا المفروض مايغلطوش !
مش هما لسه بشر برضه و لا إتحولوا علشان بيخدموا؟
هما فعلا دورهم يعالجوا الناس زى الدكتور لكن من حقهم يغلطوا, متسرقش إنسانيتهم, الطبيعى إنهم يغلطوا, اللى مش طبيعى إنك تستغرب!
والعلاج أصلا من المسيح بس, هو مصدر العلاج, وإطمن يا سيدى طول ماهما جوه الكنيسة هيتعالجوا هايتعالجوا , الخوف عليك أنت اللى عايز تسيبها :) , الخلاص بره الكنيسة صعب جدا جدا جدا جدا جدا.
2- طب ياعم, الطبيعى إنهم يغلطوا, بس دول قدوة , و غلطة عن غلطة تفرق!
- أنت عارف أن الغلط عند ربنا واحد؟
الخطية هى الخطية مهما كان نوعها! احنا ماعندناش حاجه اسمها خطيه كبيره واخرى صغيره
الفرق بين الخطايا هو تأثيرها على الإنسان اللى بيغلط.
- سؤال: الخادم لما يغلط , بيغلط علشان هو شرير ولا الشيطان بيحاربه؟
- طب لو علشان هو بشر و الشيطان بيحاربه , تزعل من الخادم ولا من الشيطان؟
- طيب لو واحد ضربك بعصاية , تزعل من العصاية ولا من الشخص اللى ورا العصاية؟
إحنا حربنا مع الشيطان مش مع بعضينا
- سؤال تانى: مادام الشيطان هو اللى بيحارب , يبقى دى تجربة بسماح من ربنا, صح؟
- و مادام تجربة خلت الخادم يغلط غلطة كبيرة فى نظرك يبقى أكيد التجربة دى شديدة قوى!
- ومادام تجربة شديدة و ربنا بيسمح بالتجارب اللى على مقاسنا و اللى نقدر عليها, يبقى أكيد الخادم ده حياته الروحية عالية جدا و اكيد أحسن منى ومنك علشان كده ربنا سمح بالتجربة دى ليه.
- يبقى تُعثر من واحد بيتحارب من الشيطان و حياته الروحية أعلى مننا؟
3- المسيح قال أنظروا الأول سيرتهم و تمثلوا بإمانهم؟؟
( سيرتهم = قصة حياتهم)
لأ, هو قال أنظروا لنهاية سيرتهم و تمثلوا بإمانهم....
ليه؟ عشان هما هينتصروا فى النهاية... وساعتها بقا لما ينتصروا على التجربة حياتهم الروحية هتكون أحسن و أقوى , وهيطلعوا لمرحلة أعلى.
حضرتك شوفت واحد فى نص التجربة, شوفته و هو بيتحارب, وهو ضعيف,
مش معنى كده إنه وحش أو إنه حتى خاطى, معنى كده إنه بيجاهد. معنى كده إنه هينتصر و هيكون أقوى وأحسن, طول ماهو جوه الكنيسة ماتخفش عليه.
وانت شفت الحالة دى علشان عندك بُعد نظر؟ ولا عندك نظرة فاحصة ثاقبة للنفس البشرية؟
ولا ربنا سمحلك و كشفلك فعل غلط عمله غيرك؟ ويا ترى سمحلك تشوف غلطة غيرك لـــيــــــه؟
هو ده السؤال اللى تسأله لنفسك..... أكيد مش علشان تُعثر :)
آخر حاجة :
أبو مقار لما كان يشوف راهب مبهدل هدومة و مش مهتم بنفسه كان يقول الراهب ده أحسن منى ,ده ناسك و مش مهتم بالارضيات,
ولما يشوف راهب مهتم بلبسه و لابس حاجات غالية وفخمة مثلا, يقول الراهب ده أحسن منى, ده بيخبى فضايله و صفاته الحلوة بشوية الشكليات دى.
مين المستفيد من تصرف أبو مقار؟
هل الراهب الاول ولا التانى ولا أبو مقار نفسه؟
الاولوية لحياتك الروحية , مش حياة الآخرين الروحية.
إفتكر التلات نقط كده علشان ماتقولش انا معثر دى :
1- الكنيسة مستشفى
2- دى حرب روحية
3- نهاية سيرتهم
مينا محسن رزق
** لا توجد تعليقات على هذه الفكرة..
