البوربوينت
الفيديو
القصص
الفقرات الكتابية
أقوال الآباء
الاسكتشات
وسائل الإيضاح
الدروس
ماركو برسوم
2024-05-16
شيطان يضحك على الصلاة
(قصة عن التوبة)
ليه انا ساعات في حربي مع الشيطان بطلب معونة ربنا ومش بيسمعني؟
الإجابة: عشان بحب الخطية ومش عايز اتوب عنها..
في ايام البابا بطرس الجاولي والانبا صربامون ابو طرحه
كان قاعد مره البابا بطرس في البطريركيه
ف جولو ناس عندهم ابنهم عليه شيطان
والشيطان بيتعبه جامد
وقالوا له يا سيدنا الحقنا يا سيدنا الحقنا الولد متبهدل
وياريت قداستك تصلي له عشان الشيطان يطلع
كان قاعد ساعتها مع البابا بطرس مطران القدس
فما كان من البابا بطرس الا راح قال لهم انا ما عنديش موهبه اخراج الشياطين
انا مش بعرف لكن انتظروا شويه جاي بعد ساعتين ثلاثه جاي الانبا صربامون ابو طرحه
وده راجل قديس وهو اللي يقدر يتعامل مع الشيطان
الحقيقه الكلام ده ما جاش على هوا سيدنا مطران القدس
فراح بص لقداسه البابا وقال له يا سيدنا يعني ازاي تقول الكلام ده
يعني قداستك صلي لو صليت عليه هيطلع الشيطان
قال له لا يا سيدنا انا صدقني ما عنديش الموهبه دي
دي موهبه ربنا بيديها لبعض من الناس انا ما عنديش الموهبه دي
قال له ما تقولش الكلام ده انت بطرك الكنيسه الموضوع سهل جدا
ده اصغر واحد يقدر يطلع الشيطان ده
فالبابا بطرس قال له الحقيقه انا مش هقدر
انا قلت لهم يستنوا الانبا سرابامون هو اللي يجي
قال له لا ما يصحش الكلام ده وانت شايف الولد متعذب وبتاع
ولو انت ما صليتش عليه انا هصلي عليه وهطلع منه الشيطان
فالبابا بطرس قال له خلاص اتفضل
دخلوا الولد اوضه ودخل مطران القدس معاه
قعد يصلي
وكل ما يجي يصلي
الشيطان يعمل ايه؟
هاهااااا ويقعد يضحك
يصلي ازيد والشيطان يضحك
لغايه لما مطران القدس بقى ابتدى يتضايق
قاله انت بتضحك على ايه انا عايز اطلعك مش تضحك
قال له مش هتقدر تطلعني
قال له انا هقعد اصلي لغايه ما اطلعك
قال له وانا مش هبطل ضحك
قعد على الكلام ده يمكن اكتر من ساعه
ده يصلي وده يقعد يضحك
فالمطران خلقه ضاق بقى
قال له انا مش عارف انت بتضحك ليه
قال له اصل انت مش هتعرف تطلعني
انت نسيت امبارح كنت قاعد مع مين وعمال تتكلم كلام مش حلو على ابوك البطرك تقول ده راجل كبر مايفكرش كويس
مش هتعرف تطلعني وفعلا الشيطان ماطلعش
عشان بيكون الانسان قلبه مش مستقيم
ماعرفش ينتصر على الشيطان
"إن راعيت إثما في قلبي لا يستمع لي الرب." (مز 66: 18).
تكملة القصة :
الناس رجعوا تاني للبابا وقالوا له نعمل ايه
قال لهم انا قلت لكم استنوا الانبا صربامون شويه
وراح دخل الأنبا صربامون فقاله البابا بطرس : يا انبا صرابامون
من فضلك صلي على الاخ ده اخرج منه الشيطان
قال له يا سيدنا مستحيل بقى في وجود قدستك بابا الكنيسه
انا برضو اللي هطلع شيطان ما يصحش يا سيدنا
قال له يا سيدنا انا ما عنديش الموهبه دي وانت ربنا اداك الموهبه دي
وربنا هيخرج الشيطان بصلاتك
قال له......
قعدوا كده لغايه لما سيدنا انبا صربامون قال له خلاص يا سيدنا البابا
انا موافق بس بشرط واحد بس
وانا بصلي له هبقى ماسك الصليب بتاع قداستك
وصليب قداستك هو اللى هيخرج الشيطان
وبالفعل اول ما انبا سرمون حط صليب قداسه البابا وصلى على الشاب
خرج منه الروح النجس
ما يقدرش يا احبائي يستحمل انسان متضع ابدا ابدا
لكن عند الانسان المتكبر يقدر يقف قصاده ويقدر ربما يستهزئ بيه
لكن عند الانسان المتضع ماقدرش يفتح بقه
يتحرق بسكات
الانسان المتضع ليه سلطان على الشيطان
