البوربوينت
الفيديو
الفقرات الكتابية
أقوال الآباء
الاسكتشات
وسائل الإيضاح
الدروس
ماركو برسوم
2022-09-23
طابور العيش
(قصة عن الإيمان)
فى طابور العيش......
انهارده كنت واقف في طابور العيش , قرفان من الشمس وعمال باندب في حظي .. وكنت مستني دوري يجي ..
ومحضر في ايدي 2 جنيه وشنطة فاضية عشان احط فيها العيش .. لكن كنت ملاحظ راجل فقير عجوز اوي كان واقف قريب من الطابور ووشه مليان من تجاعيد عشرات السنين اللي عاشها واللي اصروا يسيبوا بصمتهم عليه
وفضل باصص علي الطابور مستني حاجة معينة انا مش عارف هي ايه بصراحة !؟ ولما جه دوري : قام فجأة لقيته ناطط قدامي وقاللي : " معلش يابني انت شباب وزي اولادي . . معلش هاخد بس 5 ارغفة و هامشي علطول ! " ( مع ان الصف كله كان شباب بس انا حاسسيت ان فيه رسالة جيالي )
المهم قلتله : اه طبعا . اتفضل
فلمحته قام مطلع ورقة من جيبه وحضنها جامد اوي وهو مبسوط
( انا قلت اكيد صورة ابنه وللا مراته ! ) فركزت شوية وبعدين اكتشفت انها " 50 قرش" !!! وان دي كانت اخر ورقة معاه ! فقدمها للبياع وقاله : " اديني 5 ارغفة يابني " فقام البياع مديله 5
ارغفة و رجعله الباقي ( ربع جنيه )
انا بقي لقيت نفسي تلقائيا باقوله : يابا متاخد 5 تانيين بالربع جنيه واهو توفر مشوار ... قام قاللي كلمة صادمة مش قادرة تسيب ودني لحد دلوقتي .. قاللي : " يابني اصل انا لوحدي وماعنديش تلاجة
فهايبوظوا حرام " .. وراح حاضن ال 5 ارغفة ووشه بيرقص من الفرحة .. وراح مشي وهو عمال يبوس ايده وش وضهر !!
انا كده بصراحة حسيت ان فيه حد جه وقام رازعني بالقلم علي وشى وسابني ومشي ! وبقيت مكسوف فجأة من ربنا جدا !! يعني ايه ماعندوش تلاجة ؟؟!!! و ايه الفرحة العارمة اللي بال5 ارغفة دول ؟؟؟ ايه البساطة
والقناعة دي ؟؟
انتوا متخيلين يعني ايه ماعندوش تلاجة ؟؟!!!! يعني عمره ماشرب ميا ساقعة في بيته !!!!
يعني عمره ما خزن اي اكل لبكرة !!!! يعني بياكل انهاردة
ويا عالم بكرة لقي لقمة وللا لأ !!
يعني مش عايل هم فطار اليوم اللي بعده !!
وعنده كل الايمان انه
" لا يخزي كل المتكلين عليه " ..
وان ربنا هايبعتله كل وجبة في وقتها فسلمله العيشة كلها , حتي رغيف العيش مابقاش يخزنه ليبوظ ..
وحتي لو ماباظش : " ماهو ربنا هايبعتلي عيش طازة بكرة "
كتيير بننكرك يا رب ب تذمرنا علي حالنا , و بعدم ثقتنا فيك .. و نلاقي الفقير المعدم بيشهدلك كل يوم
وبيشكرك
** لا توجد تعليقات على هذه الفكرة..
